அனர்த்த நிலையில் தொற்றுநோய் அபாயம் - குழந்தைகள் அவதானம் வைத்தியர் எச்சரிக்கை!!

  

அனர்த்த நிலையில் தொற்றுநோய் அபாயம் - குழந்தைகள்   அவதானம்  என வைத்தியர் எச்சரிக்கை!

வெள்ளம் மற்றும் அனர்த்த நிலைமைகள் காரணமாக குழந்தைகளிடையே தொற்று நோய்கள் பரவுவதற்கு அதிக வாய்ப்புகள் உள்ளதாக குழந்தை நோயியல் வைத்திய நிபுணர் தீபால் பெரேரா தெரிவித்துள்ளார். 

இவ்வாறான குளிரான காலநிலையுடன் வயிற்றுப்போக்கு, குடற் காய்ச்சல், எலிக்காய்ச்சல் மற்றும் இன்புளூயன்ஸா உள்ளிட்ட நோய்கள் அதிகரிக்கும் போக்கு காணப்படுவதாகவும் அவர் வலியுறுத்தினார். 

வெள்ள நிலைமை தணிந்த பின்னர் டெங்கு மற்றும் சிக்குன்குனியா போன்ற நோய்கள் தலைதூக்கும் அபாயம் உள்ளதாகவும் வைத்தியர் சுட்டிக்காட்டினார். 

வைத்தியர் தீபால் பெரேரா மேலும் தெரிவிக்கையில், 

முகாம் ஒன்றில் இருந்தாலும் சுத்தமான உணவையும் தண்ணீரையும் வழங்க முடிந்தால், அதுவே பெரிய விடயம். அசுத்தமான தண்ணீரால் உயிரிழப்புகூட ஏற்படலாம். நாம் தானம் கொடுத்தாலும் சுத்தமாகத்தானே கொடுக்கிறோம். இந்த நாட்களில் ஈக்கள் அதிகரித்துள்ளதால், உணவைப் பாதுகாத்துக் கொள்ளுங்கள். அதன் மூலம் இந்த நிலையைத் தணிக்க முடியும். 

வயிற்றுப்போக்கு ஏற்பட்டால், வீட்டில் ஜீவனி (ORS), வறுத்த அரிசிக் கஞ்சி, எலுமிச்சை, தோடை, நாரந்தை, மாதுளை, வாழைப் பழங்கள், இளநீர், யோகர்ட் போன்ற உணவுகள் நல்லது. 

முகாம்களில் உள்ள பிள்ளைகளுக்குத் தடுப்பூசி போடாதவர்கள் இருந்தால், அது மற்றவர்களுக்கு மிக விரைவாகப் பரவலாம். சின்னம்மை (தட்டம்மை), கக்குவான் இருமல் போன்ற நோய்கள் பரவுகின்றன. அரசாங்கத்தால் வழங்கப்படும் தடுப்பூசிகளைப் பெற்றிருந்தால் பல நோய்களிலிருந்து பாதுகாப்பாக இருக்கலாம். 

எந்தவொரு விடயத்தையும் எதிர்கொள்ள நாம் தயாராக இருக்கிறோம். பயப்பட வேண்டாம். வெள்ள நீர் பாய்ந்து அந்த இடத்திற்குச் சென்றால் எலிக்காய்ச்சல் ஏற்படலாம். வைத்தியர் பரிந்துரையின்படி அதற்காக டொக்ஸிசைக்ளின் 200 மி.கி மாத்திரையை எடுத்துக்கொள்ளுங்கள் என  அவர் மேலும் தெரிவித்துள்ளார்.